Halldór Einarsson fæddist í Brandshúsum í Gaulverjabæjarhreppi 15. október 1893. Foreldrar hans voru Einar Einarsson bóndi þar og kona hans Þórunn Halldórsdóttir frá Teigi í Fljótshlíð.
„Mig langaði alltaf að læra tréskurð, en það var ekki hægt að komast að, bara eitt verkstæði, og það var fullsetið. Ég beið því í fimm ár eftir plássi hjá Stefáni Eiríkssyni, og þegar það tókst, var ég þar í fjögur ár og tók þá próf í teikningu og tréskurði."

Halldór hélt til Vesturheims árið 1922 og starfaði lengst af ævinnar við tréskurð í húsgagnaverksmiðju í Chicago.

Snemma tók hann þá ákvörðun að hann vildi ekki leitast við að vinna sér heiður og nafn sem listamaður. Hann vildi heldur skera út rósir og króka sem iðnaðarmaður. Halldór vildi heldur ekki nota orðið list um verk sín því þau væru tómstundaverk og sum gerð af þörf fyrir afþreyingu.

„Kreppan kom og fór. Svo kom stríðið, og um það leyti sem það byrjaði, þá giftist ég pólskri konu Josefine Jablonsky og bjuggum við í Chicago í 10 ár. Þá dó konan mín. Þá nokkru áður átti ég tækifæri til að kaupa litla lóð úti í smábæ 25 mílur frá Chicago og hugsaði mér oft, að hérna ætlaði ég mér að deyja. Ég hugsaði ekkert um að fara til Íslands, bjó aðeins sem einbúi úti í þessum skógi, í kofa þar á þessum litla bletti. Þarna bjó ég í full tuttugu ár, einsamall með hinni dásamlegu náttúru." (Páll Lýðsson skráði í mars 1975)

Í kringum 1930 skar Halldór út í húsgögn fyrir rafmagnsfrömuðinn Hjört Þórðarson. Voru þau í bókasafni Hjartar á Klettey í Michiganvatni, en safn það var fágætt að gæðum. Bók um þessi verk Halldórs kom út árið 1999. Sjá nánar um verk Halldórs í Klettey.

Árið 1965 kom Halldór aftur til Íslands og eftirlét Árnessýslu þá skornu gripi í tré og stein, sem hann hafði heim með sér úr Vesturheimi. Hann lést á Hrafnistu í Reykjavík árið 1977. Sjá nánar um gjöf Halldórs til LÁ.

Að baki verka Halldórs liggja ólíkar hugmyndir. Í mörgum þeirra birtist söknuður útflytjandans, sem horfir til baka á sögueyjuna sína. Í öðrum eru áhrif af táknfræði ólíkra menningarheima og dulspeki, sem var í hávegum höfð meðal listamanna eins og „The Sevens" í Chicago og áberandi í verkum Einars Jónssonar sem Halldór dáði. Halldór var mjög hugmyndaríkur við túlkun allskonar táknmáls í tré. Hann fór ótroðnar slóðir og frá skarpri þjóðfélagsádeilu slær jafnvel skyndilega út í grín.
Forsíða // Ævi og störf // Verk í Klettey // Gjöf til Listasafns Árnessýslu // Sýnishorn af verkum
Listasafn Árnessýslu // English